• Felicitará as festas coa tarxeta navideña que resulte gañadora

  • O certame de narración ten modalidades escrita e oral

O Concello de Rois vístese xa de Nadal e convida ao alumnado dos centros escolares do municipio a pensar tamén nestas datas que se aveciñan participando en dous concursos diferentes, un de postais e outro de contos.

O certame de tarxetas navideñas servirá para que o Concello seleccione a postal coa que felicitará as festas. Poderá participar no mesmo todo o alumnado de infantil e de primaria da Galiña Azul e dos colexios dos Dices e de Urdilde. A participación pode ser individual ou colectiva e os concursantes teñen plena liberdade para darlle renda solta á súa creatividade e empregar a técnica que consideren máis axeitada. Os únicos requisitos a ter en conta son o tamaño do traballo (din A5, medio folio) e que deben ser orixinais e inéditos.

Os traballos entregaranse en papel nos propios centros educativos e irán acompañados dunha folla na que figuren os datos do concursante: nome e apelidos, centro educativo, curso e un teléfono de contacto. O prazo remata o venres 11 de decembro.

Concurso Postais

Premiarase a mellor creación en cinco categorías: de 1º a 3º de infantil; de 4º a 6º de infantil; de 1º e 2º de primaria; de 3º e 4º de primaria e de 5º e 6º de primaria. Entre estes, seleccionarase a postal coa que o Concello felicitará as festas e os outros catro empregaranse para anunciar os actos programados durante o Nadal. O resto de participantes recibirá un diploma acreditativo.

O concurso de contos, impulsado desde as bibliotecas escolares en colaboración coa biblioteca municipal, establece dúas modalidades: unha de narración escrita e outra oral. Pode participar todo o alumnado matriculado en centros educativos de Rois e, para facelo, terá que achegar ben un texto escrito (en papel ou por correo electrónico) ou ben un arquivo sonoro ou audiovisual.

Os textos en papel entregaranse nos centros educativos. O alumnado de Urdilde tamén pode enviar os arquivos dixitais por WhatsApp ao teléfono do colexio (650 485 787). O resto dos traballos dixitais enviaranse por correo electrónico ao enderezo Este enderezo de correo está a ser protexido dos robots de correo lixo. Precisa activar o JavaScript para velo. ou por WhatsApp ao teléfono do Concello de Rois 650 485 787.

Pode participar todo o alumnado, de xeito individual ou colectivo, cos únicos requisitos de facer o seu traballo en galego e que sexa orixinal e inédito. O prazo de presentación finaliza o martes 15 de decembro.

Os mellores traballos serán premiados en sete categorías, ao sumar ás anteriores o alumnado de 1º e 2º de ESO e de 3º e 4 de ESO.

As bases poden consultarse nos arquivos adxuntos.

  • Ramón Tojo agarda que as filmacións “sirvan para dar a coñecer os valores patrimoniais e naturais que atesoura Rois”

  • As gravacións combinan imaxes e testemuños para poñer en valor as paisaxes, a tradición oral e o rico patrimonio do municipio

20201027 videos Rutas CastroLupario alcaldeDous roteiros para coñecer mellor o patrimonio natural e humano de Rois, retratados. O Concello de Rois presentou dous vídeos que percorren  as rutas de sendeirismo das Penicias e do Castro Lupario, facendo parada nalgúns dos atractivos do municipio e recollendo os testemuños dos veciños e veciñas que os habitan. O alcalde, Ramón Tojo Lens, presentou as filmacións acompañado de Juan Martínez, director da produtora que realizou as filmacións, e dos veciños roisenses que participaron na gravación.

Arredor de 15 persoas asistiron á presentación onte á tarde no Auditorio Municipal de Rois, previa invitación e respectando as medidas de seguridade e distanciamento obrigadas pola crise da covid-19. O alcalde, Ramón Tojo, fixo referencia na súa intervención á importancia de dispoñer de espazos naturais coma os reflectidos nos vídeos, máis aínda nestes tempos nos que se reduciu por forza a oferta de actividades en espazos pechados. O rexedor agarda que estes vídeos "sirvan para dar a coñecer, non só entre a veciñanza, senón en toda Galicia, os valores patrimoniais e naturais que atesoura Rois".

As películas, de 8 minutos de duración cada unha e dispoñibles na canle de YouTube do Concello de Rois, seguen a andaina dos camiñantes combinando imaxes de dron e primeiros planos coas intervencións dos veciños. En total, máis de vinte persoas participaron na realización dos vídeos, producidos pola empresa compostelá Alicentis. O seu director, Juan Martínez, agradeceu a súa colaboración e destacou que “estes vídeos non só falan da sinalización ou dos percorridos en si, senón que tamén poñen en valor a memoria oral e o conxunto de bens naturais e históricos que ten este municipio da comarca do Sar”.

20201027 videos Rutas CastroLupario Penicias publicoNeste sentido, cabe destacar a participación no vídeo da Ruta das Penicias de Luísa Calvo, María Martelo e Carmen Lamas, veciñas da parroquia de Rois, encargadas de recordar as tradicións vinculadas a algúns dos lugares que percorre a gravación: a fonte de Sanamede ou das Penicias, o prado no que estaban a capela medieval e o camposanto de San Mamede ou o Muíño do Campanario. A voz en off do filme foi gravada por Laura Ríos, moza do municipio que tamén participou como camiñante xunto con Clara Pardal e Antía Vicente.

No que toca ao vídeo sobre o Castro Lupario, son Marcos Santos e Mariano Pineda, veciños de Angueira de Castro, os que destacan a grande importancia etnográfica da aldea, proposta para a súa clasificación como Ben de Interese Cultural en conxunto co Castro Lupario.

A música dos vídeos foi cedida por Vai de Trío, grupo tamén do municipio. Os acordes de ‘Todo é fume’, nas Penicias, e do ‘Pasodobre de Berlai’, na ruta do Castro Lupario, acompañan os pasos dos veciños e veciñas que participaron nas filmacións.

Ruta das Penicias

O Concello de Rois sinalizou e acondicionou a Ruta das Penicias en 2018. Coincidindo coas festas patronais do Santo Isidro, o 19 de maio dese ano unhas 170 persoas realizaron este percorrido circular de 8,5 km na súa variante completa e de dificultade baixa. A ruta comeza e remata na Igrexa de San Mamede de Rois e discorre polas aldeas de Rois, Infesta, A Casa do Porto e Buxán.

O sendeiro transcorre paralelo ao río Rois por unha zona moi escarpada e chea de penas; de aí o nome de sendeiro das Penicias. A tradición di que preto deste sendeiro naceu San Mamede, a quen se lle dedicou a antiga igrexa medieval que se atopaba cruzando o río. A actual igrexa barroca conta cunha estrutura única no concello, xa que a torre campanario se ergue formando un pórtico de entrada ao templo.

Tres mulleres de Rois falan no vídeo das historias da tradición oral que recibiron dos seus devanceiros. Luísa Calvo, María Martelo, e Carmen Lamas —de 89, 87 e 73 anos respectivamente—, destacan as propiedades da auga da fonte de San Mamede que nace no alto do Píndalo, á que se lle atribúen efectos milagreiros para as dores de barriga e de estómago.

Outro dos puntos de interese que se visitan na versión completa da ruta é A Casa do Porto, unha aldea situada nun alto e rodeada de prados que regala fermosas vistas panorámicas e na que, ademais, se atopa unha eira con cinco hórreos restaurados e un cruceiro. Existe tamén a posibilidade de realizar medio percorrido, de 4,2 quilómetros.

Ruta do Castro Lupario

Os Concellos de Rois e Brión, con axuda da Xunta, fixeron un forte investimento en 2018 para limpar o Castro Lupario e sinalizar esta ruta de sendeirismo, que ten un percorrido base de 3,6 km e diferentes variantes coas que se pode alongar ata os 4,5 km. O seu carácter circular permite comezala en diferentes puntos, aínda que no vídeo se aconsella iniciala no Xardín do Recordo do Pazo do Faramello, por ser un lugar no que é doado estacionar.

Os lugares de interese que percorre este itinerario son a Ponte Paradela, o Castro Lupario, a aldea e área recreativa de Angueira de Castro, o río Tinto e o Pazo do Faramello. Sinala Marcos Santos, veciño de Angueira, que “camiñar por aquí e dar un paseo pola historia de Galicia”. Danlle a razón un castro intimamente ligado coa lenda da Raíña Lupa e coa historia da Traslatio dos restos do Apóstolo Santiago a Galicia; unha aldea con casas de variadas tipoloxías e na que unha torre que foi catalogada como pazo controlaba o paso entre o sur e o norte de Galicia; o Pazo do Faramello, que albergou a primeira fábrica de papel de Galicia, de 1710; un río, o Tinto, que deu servizo á imprenta, a unha fábrica de curtidos e a varios muíños; e xa na actualidade, unha zona de reforestación de especies autóctonas e un xardín que recorda as vítimas do accidente do tren Alvia en Angrois en 2013.

Enlaces de interese:

Vídeo da Ruta das Penicias: https://youtu.be/Hv0kbRgl-ew

Vídeo da Ruta do Castro Lupario: https://youtu.be/k0GzbTfqI1s   

Track e información da Ruta das Penicias:

http://concelloderois.org/gl/areas/educacion-cultura-xuventude-e-deportes/ruta-das-penicias

Track e información Ruta do Castro Lupario:

http://concelloderois.org/gl/areas/educacion-cultura-xuventude-e-deportes/ruta-do-castro-lupario

SUSPENDIDAS ACTIV DEPORTIVAS

 

Logo de ver as restricións que publicadas o mércores 21 de outubro no DOG n.º 212-Bis e ante a incerteza da situación que estamos a vivir, dende o Concello de Rois decidimos suspender as actividades deportivas, ata que a evolución da pandemia da COVID-19 vaia mellorando

Concretamente, suspéndense as actividades de:

  •  judo
  •  tenis
  •  patinaxe artística
  •  ximnasia rítmica
  •  pilates
  •  zumba
  •  ioga
  •  ximnasia mantemento +55.

Dende o Concello de Rois queueremos agradecer o esforzo das empresas, clubs e do equipo de persoal que está á fronte das actividade municipais e agardamos que pronto volvamos á verdadeira normalidade. 

E ao conxunto das familias e persoas participantes, agradecémoslles a confianza depositada no Concello unha vez máis. Boa conta diso dano as máis de 110 matrículas realizadas no colectivo infantil e no colectivo de persoas adultas.

Esperemos que cando volvamos a reiniciar as clases, sexa xa para non parar.

  • O alcalde, Ramón Tojo, asinou hoxe o convenio de colaboración coa Fundación Rosalía de Castro, representada polo seu presidente Anxo Angueira

  • Este concello xa apoiara a creación da Casa Museo en 1971 cunha achega de 500 pesetas

  • Tanto os escolares do municipio como as asociacións culturais poderán ter visitas guiadas de balde á Casa de Rosalía.

  • En tempos de Covid, as e os veciños de Rois poderán visitar o museo de xeito gratuíto

  • Anxo Angueira: “Esta nova crise supuxo un duro revés. Grazas a estes apoios estamos resistindo e afrontamos o futuro coa maior das ilusións"


 20201023 convenio fundacion Rosalia 01

 

O alcalde de Rois, Ramón Tojo,  asinou esta mañá o convenio de colaboración coa Fundación Rosalía de Castro, que o converte no quinto concello Mecenas da Casa de Rosalía dentro do proceso de subscrición popular para implicar a empresas, entidades públicas e persoas individuais na mellora e no sostemento da causa común da Casa da Matanza, “que é a causa común de Galicia”, en palabras do seu presidente Anxo Angueira.

En virtude deste convenio anual polo que o Concello de Rois achega 1.000 euros, tanto os escolares do municipio como as asociacións culturais poderán ter visitas guiadas de balde á Casa de Rosalía. Sen embargo, dado que estas visitas non están permitidas por mor das restriccións da covid-19, mentres os veciños e veciñas de Rois poderán visitar gratis o museo acreditando documentalmente a súa procedencia. 

20201023 convenio fundacion Rosalia 04Ramón Tojo calificou esta firma como "moi importante para axudar ao mantemento da Fundación Rosalía de Castro e por en valor o rico legado cultural que temos na comarca do Sar". Con esta decisión Rois refrenda así o seu compromiso histórico con esta institución, dado que xa apoiara economicamente en marzo de 1971 cunha doazón de 500 pesetas para a posta en marcha da Casa-Museo, sendo alcalde Peregrino Castro.

O alcalde firmou no libro de honra da Fundación e conversou uns minutos co seu presidente.

Centos de persoas de todo o país –e máis alá– xa se converteron en Amigas da Casa de Rosalía ao apoiar desde 20 euros ao ano a independencia económica e cultural desta institución, así como a súa sostibilidade financeira. A subscrición popular está a ser un grande éxito e moitos pequenos negocios tamén son xa Protectores (desde 60€/ano), así como varias grandes empresas da comarca, que xunto cos concellos poden exercer de Mecenas da Casa a partir de 1.000 euros ao ano.

“En 2019 acadamos unha taxa de autofinanciamento próxima ó 50%, que é unha cifra considerable”, afirmou Anxo Angueira. “Porén esta nova crise supuxo un duro revés. Grazas a estes apoios estamos resistindo e afrontamos o futuro coa maior das ilusións. Seguiremos intentando facer o mellor servizo posíbel á causa da difusión nacional e internacional do legado de Rosalía e da súa familia”. 

 Segunda subscrición popular

A Casa de Rosalía está sostida pola Fundación Rosalía de Castro, unha fundación privada sen ánimo de lucro que foi creada en 1947 por persoas vencelladas ao galeguismo nos tempos difíciles da ditadura. A apertura da Casa-Museo en 1972 só foi posible grazas á colaboración económica de familias e empresas e institucións de todo o país e do mundo da emigración. 

Daquela participaron centos de persoas anónimas de Galicia a partir da proposta de José Manuel Rey de Viana, organizáronse colectas en moitas vilas e en case todos os centros galegos na emigración, uníronse máis de 60 concellos, varios bancos, a Federación de Caixas de Aforros, o Celta de Vigo, a Federación Galega de Ciclismo e innumerables asociacións de todo o país. Ao final, colleitouse un total de 994.043 pesetas en 1971.

Case 50 anos despois esta institución –que non recibe financiamento público regular que asegure o seu mantemento anual nin o seu futuro– quere reafirmarse na súa independencia económica e cultural e no apoio das xentes comprometidas co país e coa súa cultura.

Autofinanciamento do 45%

A Casa-Museo tivo unha taxa de autofinanciamento do 45% (2019, que evoluciona desde un 20% en 2012), cifra considerable na nosa contorna cultural, “mais entendemos que cómpre aínda percorrer camiño na procura dun mellor servizo a prol da difusión do legado de Rosalía e da súa familia”, afirma Anxo Angueira, presidente da Fundación. A evolución das visitas á Casa tamén foi positiva ata a chegada da Covid: incrementáronse desde 2012 ata 2018 nun 237% (de 8.655 a 20.571). 

A Fundación Rosalía quere continuar neste vieiro para “asegurar o seu presente e, sobre todo, o seu futuro, para seguir avanzando na mellora da Casa-Museo, da súa xestión e dos seus servizos”, continúase desde a Fundación, que afirma que é xa un dos museos galegos máis visitados “e debe estar na vangarda cultural e ser un referente a nivel nacional e tamén internacional”. 

Anxo Angueira, referencia actual da institución rosaliana, salienta que “aínda que somos escoitados polas institucións públicas de Galicia, queremos que o esforzo colaborativo sexa tamén un esforzo comunal e compartido polo pobo galego, que sempre foi xeneroso con todo o que tiña que ver con Rosalía para que a Casa da Matanza e as súas instalacións sexan dignas da figura que representan”.

A Casa de Rosalía incrementou exponencialmente os proxectos e actividades desde 2012. Alén da desexada reforma do interior da Casa e da súa renovada musealización, catalogouse e dixitalizouse todo o fondo documental e acondicionouse unha sala para o arquivo, que xa está a disposición dos investigadores; dinamizouse a súa presenza na web e nas redes sociais; incrementouse o seu patrimonio coa chegada de novos obxectos, artísticos ou non, como o cadro de Brocos e diferentes pezas de Ovidio Murguía; publicouse a súa Obra completa, entre outros libros; relanzouse a celebración do Día de Rosalía e puxéronse en marcha ducias de actividades ao longo do ano: a homenaxe ao mundo do mar, o festival Abride a Fiestra, alén de múltiples exposicións, conferencias, roteiros, teatralizacións e visitas guiadas. 

20201023 convenio fundacion Rosalia 03

  • É a maior cifra de alumnado acadada ata o momento

  • O director Manuel Villar mantivo onte unha reunión coas familias para informar das novidades deste ano

  • Son todas clases individuais salvo Linguaxe musical, Agrupación e Música en movemento que terán un máximo de 5 alumnos por grupo

20200618 Concerto ESMU ALI1326

A Escola Municipal de Música de Rois vai comezar novo curso o vindeiro luns con 80 persoas matriculadas, a cifra máis elevada de alumnado dende que se puxo en marcha. Todas as clases serán individuais, agás as de Linguaxe musical, Conxunto instrumental, Música en movemento e Coro, que terán un máximo de 5 persoas por grupo, segundo lles explicou onte o director ás familias.

O director, Manuel Villar, mantivo onte a noite unha reunión informativa coas familias e co profesorado no polideportivo dos Dices, na que lles adiantou as medidas e os protocolos que se van implantar na ESMU de Rois para evitar os contaxios do coronavirus e a propagación da COVID-19.

O Concello de Rois está a facer unha forte aposta por manter as actividades deportivas e culturais neste curso que está a comezar. No caso da Escola de Música, váiselle tomar a temperatura a cada alumno e alumna antes de entrar á ESMU, dotarase de hidroxel e farase a desinfección dos instrumentos entre clase e clase para evitar a propagación da covid-19.

Este curso, a Escola de Música de Rois ofrécelle como novidade ao seu alumnado maior de 12 anos a posibilidades de estudar Harmonía e creación musical, que se suma áaprendizaxe dos numerosos instrumentos que se poden elixir na ESMU. Batería, baixo eléctrico, frauta, óboe, saxofón, tuba, violín ou acordeón son algúns deles. (ver oferta completa neste enlace).

As persoas interesadas en formarse musicalmente aínda se poden matricular na Escola Municipal de Música de Rois, que ten un prezos accesibles: 20 euros pola matrícula anual e, por exemplo, 35€/mes polas clases de instrumento e linguaxe musical. (ver folla e matrícula e opcións neste enlace).

A Escola Municipal de Música de Rois incremento de xeito considerable a súa matrícula dende que no ano 2018 o Concello promovera o primeiro intercambio  musical con Venecia. Alumnado da ESMU e de Chorima viaxaron ata Venecia para intercambiar experiencias co alumnado a Escola Comprensiva Franca Ongaro e o Liceo Musical de Venecia. 

En abril de 2019 a ESMU de Rois participou no seu segundo intercambio internacional. Nesta ocasión, unha comitiva de 25 persoas entre alumnado e profesorado da Escola de Música e do OCT Chorima, viaxaron ata Pasztó, unha localidade duns dez mil habitantes situada a oitenta quilómetros ao norte de Budapest, a capital de Hungría.

Os concertos que durante o curso ofrece a Escola de Música de Rois son outro dos atractivos para matricularse. No recentemente finalizado curso 2019-2020, que estivo marcado pola pandemia da covid-19 e o confinamento durante 3 meses, profesorado e alumnado da ESMU de Rois optaron por ofrecer dous concertos virtuais para rematar o curso, no que moitos dos participantes actuaron en directo.

O primeiro concerto, ofrecido o 20 de xuño, estivo protagonizado polo alumnado máis novo e contou con 27 actuacións

Ao día seguinte foi o alumnado de máis idade o que ofreceu o segundo concerto de fin de curso, que contou con 17 actuacións.