20190615 IMG 1612

Ramón Tojo Lens comprometeuse esta mañá a seguir “traballando por todos os veciños, con humildade e seriedade” despois de ser elexido alcalde de Rois por maoría absoluta por cuarto mandado consecutivo. Tojo animou a todos os integrantes da Corporación, ao que se incorporan dos novos concelleiros, a “traballar por todos os veciños e veciñas do municipio”

Ramón Tojo foi elexido alcalde por maioría absoluta, ao contar cos sete votos a favor do Partido Popular. Manuel Regueira Miguens, do Partido Socialista, obtivo tres votos, e o BNG xa non presentou candidatura a alcaldía.

A mesa de idade estivo presidida por Manuel dos Santos, como concelleiro de maior idade, e Martín del Río, o máis novo. Precisamente, foi Dos Santos quen lle entregou o bastón de mando simbólico ao novo alcalde, despois de que este asumise o cargo. Tras a sesión de investidura, todos os concelleiros da nova Corporación de Rois fixéronse unha foto de familia nun salón de plenos que contou coa presenza de numerosos veciños.

Na súa intervención antes de rematar a sesión e recibir as felicitacións dos asistentes e saudar aos concelleiros da oposición, Ramón Tojo deulle a benvida ao Patricia Ces e José Manuel Iglesias, os únicos que se incorporan a Corporación de Rois nesta undécima lexislatura tras as primeiras elección democráticas nos concellos de 1979.

Ramón Tojo pediu “diálogo” a todos os concelleiros e “ter sempre presente os intereses xerais dos veciños e de toda a Corporación, porque somos os concelleiros de todas as persoas que viven en Rois”. Aínda que é a cuarta vez que resulta elexido alcalde, Ramón Tojo dixo sentir “un certo nerviosismo e moita responsabilidade. Para min é unha honra ser o alcalde do meu pobo, e terei sempre presente a humildade e a honestidade coa que vin traballando este anos”.

O alcalde recordou que, cando se incorporou por primeira vez á Corporación, “unha persoa moi achegada me dixo: segue así. E creo que non cambiei, aínda que teño máis anos e sol algo máis vello”. Tojo concluíu reiterando o seu orgullo por ser alcalde de Rois e asegurou que “hai 12 anos iniciamos con paso firme unha senda que segue contando co respaldo maioritario dos veciños, e seguiremos traballando así”.

20190615 IMG 1618

A nova Corporación

A Corporación de Rois para a presente lexislatura queda conformada polos seguintes concelleiros:

Partido Popular:Ramón Tojo Lens (alcalde), Manuel dos Santos Rodríguez, María Mercedes Basanta Ares, Carlos Ares Villar, Victoria Quiroga Ramallo, Manuel Cobas Rey, Martín del Río Gestoso

Partido Socialista:Manuel Regueira Miguens, Patricia Ces Ares, José Manuel Iglesias Pérez

Bloque Nacionalista Galego:Begoña Ares Calvo

20190615 ALI4499

Patinaxe, judo, ximnasia rítmica, festival en inglés e teatro foron as actividades que programou o Concello de Rois esta tarde para a festa de clausura das escolas deportivas e actividades culturais en Rois, á que asistiron máis de cen persoas. O vindeiro venres, día 21, celebrarase a clausura en Urdilde.

20190614 ALI4438

Máis de cen persoas aplaudiron con gañas no polideportivo de Rois aos nenos e nenas que demostraron todo o que levan aprendido este curso nas disciplinas de patinaxe, judo e ximnasia rítmica. Nas escolas deportivas de Rois participan algo máis de 120 nenos, aínda que onte so participaron nas exhibicións os que acoden ao polideportivo dos Dices.

20190614 ALI4522

No auditorio municipal houbo tamén bastante afluencia de público para ver os progresos en inglés de nenos e nenas que acoden as actividades extraescolares nesta disciplina. Todos puideron gozar vendo cantar ao alumnado cancións en inglés, mentres na biblioteca os máis novos facían experimentos nunha nova sesión de Arrorois. Tamén os familiares que acoden a esta actividade escolleron dous títulos da biblioteca para engadir á exposición de libros que recomendaron os participantes no taller de contacontos.

Tras unha merenda para repoñer forzas despois de tanto exercicio, algunha que outra carreira para chegar do pavillón ata o multiúsos, e cansos de cantar, as risas non faltaron na representación das obras de teatro ‘Os tres porquiños’ e ‘Unha casa nada deshabitada’, coas que Os Vacalouras puxeron o colofón a xornada de hoxe.

20190614 ALI4509

En Urdilde, o próximo venres

O próximo venres, día 21, tocaralle o turno ao alumnado de Urdilde que participa nas escolas deportivas municipais, que participarán en exhibicións de predeporte, badminton, judo, patinaxe artística e fútbol sala. Estas actividades comezarán ás 10.00 horas e rematarán cunha festa con inchables que organiza a ANPA Urcael no patio do CEIP O Pumar de Urdilde.

Album de fotos no facebook do Concello de Rois (neste enlace).

 

CacharelaAs cacharelas de San Xoán son unha tradición en Rois e na maior parte do resto de municipios de Galicia. Para manter viva esta tradición e previr calquera tipo de incidencia e garantir unhas condicións de limpeza e hixiene axeitada dos espazos públicos, o Concello de Rois ven de facer público un bando no que se fixan as condicións necesarias e os requisitos para que todos os veciños, asociacións e colectivos interesados poidan solicitar o permiso para facer a cacharela de San Xoán.

O bando, que se pode consultar no documento adxunto, concede de prazo para presentar a solicitude de permiso para facer as fogueiras de San Xoán ata o xoves, 20 de xuño, ás 14.00 horas.

A solicitude debe presentarse no rexistro do Concello. A instancia pódese descargar no documento adxunto, cubrila por ordenador e imprimila, ou imprimila a escribir os datos a man.

Entre as principais medidas recomendadas no bando para evitar calquera tipo de incidencia figuran as seguintes:

  • Haberá sempre xente ao carón do lume, que se fará pola noite.
  • As persoas responsables da organización deberán ter á man mangueiras de auga ou calquera outro medio adecuado para a extinción do lume
  • A faixa perimetral ao lume ha de estar despexada de elementos que poidan facilitar a súa propagación. Non se poderán acender as fogueiras a menos de 15 metros de calquera edificación, tendido eléctrico, instalación de calquera tipo ou vehículo, nin a menos de 50 metros das árbores.
  • A morea de materiais que formen a cacharela non poderá exceder os 3 metros de altura.
  • Non se abandonará a vixilancia da fogueira ata que o lume estea totalmente apagado e transcorresen dúas horas sen que se observen lapas ou brasas.

 ALI4410 Web

O pleno do Concello de Rois pechou hoxe a lexislatura cunha sesión extraordinaria na que se aprobaron as actas pendentes e se despediu aos concelleiros que non repetirán no próximo mandato, que comeza o sábado.

Dos integrantes da presente Corporación despedíronse como concelleiros Olimpio Iglesias (BNG) e Pere Manuel Tobaruela (Xente de Rois).

Ao rematar a sesión, os concelleiros asistentes ao pleno fixéronse unha foto de familia.

Andaina Parellas 01O Concello de Rois e o Colectivo Remonte organizan por duodécima vez a Camiñata por Parellas, que este vai vaise celebrar o domingo 30 de xuño percorrendo diferentes parroquias do municipio.

Os interesados deberán inscribirse na web www.andainabisbarradosar.com, pagando 10 euros se o fan antes do 20 de xuño, e 15 euros para quen se anote entre o 21 e o 27 de xuño, último día de inscrición.

A proba sairá do polideportivo dos Dices as 10.00 horas (os dorsais poderán recollerse dende as 09.00 horas) e durante o percorrido de 15 km, de dificultade baixa, os camiñantes poderán coñecer Infesta,  Rois, Contimunde, A Pontevnova, A Peruca, praia fluvial de Seira, Seira, Oín, Antequeira e Os Dices.

Máis información sobre a proba nos teléfono 981 816 061 (Concello de Rois) e 630 708 435 (Asocición Colectivo Remonte).